PROUD GIGAQUITNON
by: Mar Recentes
SI OYA OKIS |
Sajo sa buntag an putos an ija pas-an
Pasingod sa Mahanub, sa Ipil gikan
An ija bayon nilupak sanan uyang
Nasudsud sa likod nan simbahan
Nanuway kuno kabii sila Mano Larry
Did-on ra sa may sea wall kabii
Nanuyû, nanûdsud, namukot
May nabingwit na bigarol sab gani…
Ugsa may bayon na napalit si Oya Okis
Na likid ni Mana Komya kaina
Naglupak kabii sila Mana Gene
Na natûba kuno kahapon sa Alambique.
Dali ra naabot an Parang
Ni Oya Okis iban an amo silingan
Kadto kuno sila para sa balanghoy
Na tanum nila sa bukid…
Kalagku gajod kay an lupa, taba man!
Pagkahapon, jari na uli sila Oya Okis
Sakay sa traysikol nila Kyakya
Upat ka sako na balanghoy
Lima ka net bag na mga gulay
Hinog an ija espesyal taghatag sab sa akû…
Kalipay nila Tay Ale!
Kalipay sab nila Fuse sanan Mana Gene
Nahatagan sab sila Mano Buguy nan parte
Sila Popo Tino, Sir Kalan sanan Popo Ande…
Nan balanghoy, gulay, pati na mga sili.
Kasiluman ako na sab an nagbakang
Pasingod na sa ako iskuylahan
Nila Mama, Mana Melda, Mi-mi, Noni pati mga silingan
Bayon an balanghoy na inasukaran…
Kalami unta kuman kon may masudsud pa!
Kalami unta kon may mapukut pa!
May tuway pa kaha sa may sea wall…
Kay bisan luyung masipog na molamyerda?
Na hala! Sige, sige lamang kita na abuso
Utud nan kahoy, hilo nan ayog an mga puluho
Moabot an panahon waya nay maihatag sa silingan;
Moabot an panahon na si Oya Okis kita kasab-an!
Kadugay na jadto na mga tuig!
Di ko gajod kalimtan an ako Oya
Pati an hinog na saging na ija pirme hatag
Kay ako man lagi an ija payanggā.
Lang-on nato na lajo na ako sa ija tagpahuwajan kuman
Pero an ija pagmatuto jari pa nagbakang…
Sa ako dubdub ako tag-ignajan
Na akû maitudlo sa akû mga liwat kuman.
Ma, Oya Okis, Popo Ande, Sir Kalan…
Unta ijo mahibayuan…
Jari sa kasingkasing ko an ijo mga tagtudlo…
Sa lainlain na mga panawan;
Unta sa Diyos ijo kami iampo
Na an amo liwat intawon mabulahan
Salamat! Salamat sa ijo mga pag-atiman.
